Allt að 57% verðmunur er á páskaeggjum í ár. Algengast var að sjá á bilinu 20-40% mun á hæsta og lægsta verði páskaeggja að því er fram kemur í nýrri verðkönnun sem verðlagseftirlit ASÍ framkvæmdi í matvöruverslunum á höfuðborgarsvæðinu í gær 9. mars. Flest páskaeggin í könnuninni voru fáanleg hjá Fjarðarkaupum og Hagkaupum en fæst hjá Samkaupum-Úrval og Nettó. 

Bónus var oftast með lægsta verðið í könnuninni eða á 20 af þeim 34 eggjum sem skoðuð voru. Hæsta verðið í könnuninni var oftast hjá Hagkaupum og Samkaupum-Úrval eða á 14 páskaeggjum af 34 og hjá Iceland á 10 eggjum. Benda má neytendum á að í næstum öllum þeim tilvikum sem eggin voru til bæði hjá Bónus og Krónunni er krónu verðmunur, þ.e.a.s. að eggin hjá Bónus eru 1 kr. ódýrari en hjá Krónunni.  

20-40% verðmunur á hæsta og lægsta verði
Oftast var um 20-40% verðmunur á hæsta og lægsta verði páskaeggjanna í könnuninni. Sem dæmi má nefna að 27% verðmunur var á 450 g. páskaeggi frá Góu sem var ódýrast á 1.495 kr. hjá Krónunni en dýrast á 1.898 kr. hjá Samkaupum-Úrval sem er 403 kr. verðmunur. Þá var 30% verðmunur á 530 g. draumaeggi frá Freyju sem var ódýrast á 2.198 kr. hjá Bónus en dýrast á 2.849 kr. hjá Hagkaupum sem er 651 kr. verðmunur.  Nóa Síríus 535 g. Nóa kropps páskaegg var ódýrast á 2.399 kr. hjá Krónunni en dýrast á 3.199 kr. hjá Iceland sem er 33% verðmunur. 

Minnstur verðmunur í könnuninni var á Freyju desert eggjum 6 stk. sem voru ódýrust á 648 kr. hjá Fjarðarkaupum en dýrust á 689 kr. hjá Hagkaupum sem er 6% verðmunur. Mestur verðmunur að þessu sinni var 57% á Nóa Síríus páskaeggi nr. 3 sem var ódýrast á 759 kr. hjá Bónus en dýrast á 1.189 kr. hjá Hagkaupum sem er 430 kr. verðmunur. 

Sjá nánar niðurstöður í töflu (smella hér)

Verðkönnunin tók til algengra páskaeggja frá íslenskum framleiðendum.

Könnunin var gerð miðvikudaginn 9.mars í eftirfarandi verslunum: Bónus, Krónunni, Nettó, Iceland, Hagkaupum, Fjarðarkaupum, Samkaupum-Úrvali og Víði.

Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.

Óheimilt er að vitna í könnunina í auglýsingum og við sölu nema með heimild ASÍ.

Starfsmenn í Straumsvík standa vörð um grundvallarréttindi launafólks og há mikla baráttu við Samtök atvinnulífsins og ISAL/Rio Tinto. Málið snýst um að tryggja að laun verktaka sem starfa á svæðinu séu mannsæmandi og sambærileg því sem greitt er hér á landi. Stjórnendur ISAL eru ósáttir við það og vilja fá að greiða verktökum lágmarkslaun og lágmarksréttindi sem í boði eru hér á landi, mögulega er það of hátt/dýrt.

Við hvetjum ykkur til þess að sýna starfsmönnum ISAL í Straumsvík stuðning og líka við síðu þeirra hér á Fésbókinni! Smellið hér.

Alþýðusamband Íslands ítrekar kröfu sína frá 18.11 2015, þess efnis að Samtök atvinnulífsins beiti sér fyrir því að gengið verði hið fyrsta frá kjarasamningi á milli Rio Tinto Alcan á Íslandi (ISAL), sem SA fer með samningsumboð fyrir,og hlutaðeigandi verkalýðsfélaga. 

Í gildi er löglegt ótímabundið verkfall (útflutningsbann á áli úr Straumsvíkurhöfn) sem fyrirtækið leitar allra leiða til þess að skjóta sér undan. Alþýðusamband Íslands fyrir hönd allra aðildarsamtaka sinna lýsir yfir fullum stuðningi við verkfallsaðgerðir félagsmanna Verkalýðsfélagsins Hlífar í Hafnarfirði. 
Jafnframt skorar ASÍ á Samtök atvinnulífsins að sjá til þess að aðildarfyrirtæki þess virði lög- og venjubundnar samskiptareglur á íslenskum vinnumarkaði. 

ASÍ hvetur félagsmenn allra aðildarsamtaka sinna og allt launafólks á Íslandi til að virða aðgerðir félagsmanna Hlífar og stuðla að því að verkfallsbrot verði ekki framin.

Þegar kemur að útborgun launa núna um mánaðarmótin febrúar/mars 2016 þá er vert að vekja athygli á því að laun skulu hækka frá 1. janúar 2016 um 6,2% samkvæmt kjarasamningum RSÍ-SA/SART (almennur kjarasamningur) og RSÍ-Félag atvinnurekenda (heildsölur og fleiri aðilar). Þetta þýðir að atvinnurekendur þurfa að reikna launahækkun til baka frá 1. janúar og greiða út.

Vinna við að uppfæra sérkjarasamninga er að hefjast og stefnt er að ljúka þeirri vinnu í mars mánuði og munu launahækkanir þeirra samninga einnig flytjast til 1. janúar á þessu ári. 

RSÍ hvetur félagsmenn til þess að fylgjast vel með því að launahækkun skili sér í umslagið hjá ykkur, ef brotalöm er á því þá hvetjum við félagsmenn til þess að leita skýringa hjá atvinnurekanda og sé skýring ekki ásættanleg þá að hafa samband við skrifstofu RSÍ og við munum aðstoða við innheimtu launahækkunar.

Sameiginlegri allsherjaratkvæðagreiðslu félagsmanna aðildarsamtaka ASÍ um kjarasamning milli aðildarsamtaka ASÍ og SA frá 21. janúar 2016 lauk kl. 12 á hádegi í dag. 

Já sögðu 9.274 eða 91,28%. Nei sögðu 832 eða 7,81%. Auðu skiluðu 97 eða 0,91%. Kjarasamningurinn var því samþykktur. 

Á kjörskrá voru 75.635. atkvæði greiddu 10.653 eða 14,08%. 

Kjörstjórn aðildarsamtaka ASÍ

Bendum félagsmönnum á að umsóknarfrestur um orlofshús um páskana er þann 25. febrúar (fimmtudag). Til þess að sækja um orlofshús er farið inn á orlofsvef RSÍ og þar er smellt á "Umsókn páskar 2016". Orlofshúsum verður úthlutað eftir fjölda punkta þeirra félagsmanna sem sækja um orlofshús. Því er mikilvægt að velja fleiri en valkost ef þú ert með fáa punkta. 

Eitt er víst að þeir sem sækja um hafa einir möguleika á að fá orlofshús úthlutað. Því er mikilvægt að senda inn umsókn.

Athugið að tvær atkvæðagreiðslur eru í gangi hjá RSÍ, um kjarasamning RSÍ við SA/SART og RSÍ við Félag atvinnurekenda. Mikilvægt er að félagsmenn smelli á réttan hnapp til þess að komast inn í atkvæðagreiðsluna.

Grænn hnappur er fyrir RSÍ-SA/SART (almennur kjarasamningur, nær til flestra félagsmanna RSÍ á almennum vinnumarkaði)

Blár hnappur er fyrir RSÍ-Félag atvinnurekenda (heildsölur, stórkaupmenn og ýmis önnur fyrirtæki).

Leiðbeiningar (smella hér)

Ljóstæknifélag Íslands (LFÍ) mun afhenda íslensku lýsingarverðlaunin 2015 í Perlunni laugardaginn 6. febrúar 2016. 

Dagskrá verður sem hér segir: 

• 17:00 Húsið opnar 
• 17:40 Íslenska ljósið. Halldór S. Steinsen lýsingarhönnuður veltir fyrir sér sérkennum íslenska dagsljóssins og greinir frá verkefni sínu 'Eitt ár af ljósi'.
• 18:00 Formaður dómnefndar gerir grein fyrir störfum nefndarinnar. 
• 18:20 Almar Guðmundsson framkvæmdastjóri Samtaka iðnaðarins afhendir Íslensku lýsingarverðlaunin.
• 18:30 Kynning verðlaunahafa á vinningstillögunni. 
  
  
  

Vekjum athygli á sérstöku tilboði frá veitingahúsi Perlunnar fyrir gesti Íslensku lýsingar-verðlaunanna.
Fjögurra rétta matseðill á kr. 7.890.
Hvetjum gesti til þess að panta sér borð í síma 562 0200 

Fjöldi félagsmanna aðildarfélaga RSÍ, sem skráðir voru í atvinnuleit í desember 2015, var 40 talsins. Það þýðir að 0,8% virkra félagsmanna voru í atvinnuleit á þeim tímapunkti og skiptist niður á aðildarfélög RSÍ samkvæmt meðfylgjandi töflu. 

Laun starfsmanna Norðuráls, sem taka laun samkvæmt kjarasamningi sem RSÍ og fleiri stéttarfélög gera við fyrirtækið, hækka um 4,70% frá og með 1. janúar 2016 en launin fylgja hækkunum launavísitölu (95% af hækkun launavísitölunnar) út samningstímann. Síðasta hækkun kom til í júlí á síðasta ári en þá hækkuðu laun um 4,32% kom sú hækkun til viðbótar við upphafshækkun kjarasamningsins.