Kæru félagar, vegna dræmrar skráningar á alla stefnumótunarfundi RSÍ sem áætlað var að halda í vikunni hefur verið ákveðið að fella þá niður. RSÍ þakkar að sjálfsögðu þeim sem skráðu sig fyrir sýndan áhuga. 

Leitað verður annarra leiða til að ná fram sjónarmiðum félagsmanna.

Mikill verðmunur milli matvöruverslana 

Í flestum tilfellum var mjög mikill munur á hæsta og lægsta verði milli matvöruverslana í verðkönnun verðlagseftirlitsins sem framkvæmd var þriðjudaginn 18. febrúar. Í um helmingi tilvika eða 58 tilfellum af 118 var munur á hæsta og lægsta verði yfir 40%. Lægsta verðið var oftast í Bónus en hæsta verðið var oftast í Iceland. 

Iceland oftast með hæstu verðin
Bónus var lang oftast með lægstu verðin í könnuninni eða í 78 tilfellum af 118 en Krónan var næst oftast með lægstu verðin, í 13 tilvikum. Fjarðarkaup var með lægstu verðin í 9 tilfellum og Nettó og Heimkaup í 7 tilfellum hvor fyrir sig. 

Iceland var oftast með hæstu verðin, í 58 tilfellum af 118 en Kjörbúðin næst oftast, í 26 tilvikum. Á eftir Kjörbúðinni kemur Hagkaup með hæstu verðin í 20 tilvikum og Heimkaup í 13 tilvikum. Sendingarkostnaður getur síðan bæst við hjá Heimkaup sem taka verður með í reikninginn. 

Það hvar hæstu og lægstu verðin eru segir ákveðna sögu og er afar líklegt að verðlag hjá verslun sem er mjög oft með lægstu verðin sé almennt lágt og að verðlag hjá verslun sem er mjög oft með hæstu verðin sé almennt hátt. Það getur þó verið erfitt að átta sig á hvernig verðlag er í þeim verslunum sem eru hvorki oft með lægstu verðin né oft með hæstu verðin og mælum við því með að fólk skoði hitaritið sem fylgir sem gefur betri tilfinningu fyrir verðlagi í þeim verslunum. Á hitaritinu eru hæstu verðin rauð og þau lægstu græn. Þar sem „e“ kemur fyrir í töflunni var varan ekki til en „em“ merkir að varan var ekki verðmerkt. 

Sjá hitarit yfir verð á matvöru (smella hér)

Yfir 40% munur á hæsta og lægsta verði í um helmingi tilvika
Almennt var mjög mikill verðmunur milli verslana í verðkönnuninni en í 31 tilviki var milli 40 og 60% munur á hæsta og lægsta verði og í 27 tilvikum var hann yfir 60%. Það þýðir að í um helmingi tilvika var munurinn yfir 40%. 

Aðeins oftar eða í 60 tilvikum af 118 var munurinn á hæsta og lægsta verði undir 40% og skiptist það þannig að í 45 tilvikum var hann 20-40%  en í 15 tilvikum var hann undir 20%. 

179% munur á kílóverði af þvottaefni
Dæmi um verðmun í könnuninni var 179% munur á hæsta og lægsta kílóverði af Neutral Storvask þvottaefni. Hæst var verðið í Nettó Granda, 1.214 kr. kg en lægst í Bónus, 435 kr. kg. 

Þá var mikll munur á hæsta og lægsta verði af Libresse daily fresh innleggjum, 61% en þau voru ódýrust í Bónus, 309 kr. en dýrust í Iceland, 499 kr. pakkinn. 

111% munur var á hæsta og lægsta verði af Hobnobs dark choc kexpakka sem kostaði minnst, 208 kr. í Fjarðarkaup en mest, 429 kr. á Heimkaup.is. 

Mikill munur var einnig á kattamat en 47% munur var á hæsta og lægsta verði af 1,75 kg poka af Wiskas þurrmat. Lægsta verðið var í Bónus, 879 kr. en það hæsta í Kjörbúðinni, 1.289 kr. 

Mjög mikill eða 168% munur var á hæsta og lægsta verði á bláberjum. Lægst var kílóverðið af frosnum bláberjum í Bónus, 758 kr. en hæst í Heimkaup, 2.033. kr. 

Að lokum má nefna 103% verðmun á frosnum ýsubitum sem kostuðu minnst, 1.298 í Bónus en mest, 2.639 kr. í Kjörbúðinni. 

Sendingarkostnaður bætist við hjá netverslunum
1.490 kr. sendingargjald bætist við hjá Heimkaup.is og Netto.is ef verslað er fyrir lægri upphæðir.
Verð í netverslunum er í þeim tilfellum ekki sambærilegt verði í öðrum verslunum.

Sendingarkostnaður ef upphæð heimsendingar er:

Um könnunina
Í könnuninni var hilluverð á 118 vörum skráð niður en það er það verð sem neytandinn hefur upplýsingar um þegar hann ákveður hvort hann ætli að kaupa viðkomandi vöru. Ef afsláttur er tekinn fram á hillu er hann tekinn til greina.

Litakóðinn í töflunni (hlekkurinn) gerir hæstu verðin rauðlituð en þau lægstu grænlituð og staðsetur þannig verslanir í verði. Til að fá fram röðunina á verslununum eru frávik frá lægsta verði reiknuð og raðast verslanirnar því eftir því hversu langt þær eru frá þeirri verslun sem er með lægstu verðin. Þar sem verð vantar eru meðalverð notuð.

Könnunin var framkvæmd í eftirtöldum verslunum: Nettó Granda, Bónus Skeifunni, Krónunni Granda, Fjarðarkaupum, Iceland Vesturbergi, Hagkaup í Kringlunni, Kjörbúðinni Sandgerði, Heimkaup.is og Netto.is. Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.

Óheimilt er að vitna í könnunina í auglýsingum og við sölu nema með heimild ASÍ.

Vegna forfalla er Skógarnes 1 laust um næstu helgi 

Í dag lauk atkvæðagreiðslu um kjör formanns FÍR. Margrét Halldóra Arnarsdóttir var kjörin formaður FÍR, fyrst kvenna í félaginu. Margrét hlaut afburðakosningu og mun taka við sem formaður FÍR á aðalfundi félagsins sem fram fer í apríl. Óskum við Margréti innilega til hamingju með kjörið og berum við miklar væntingar til samstarfs á komandi árum. Þess má geta að Margrét situr nú þegar í miðstjórn RSÍ ásamt því að hafa sinnt félagsstörfum víða og kemur því með mikla reynslu í verkefnið.

Nýr orlofshúsabæklingur RSÍ (smella hér)

Áfram halda verkefnin. Stærsta mál vikunnar var yfirlýsing Rio Tinto um rekstur álversins í Straumsvík, ISAL. Fjölmargir fundir hafa verið haldnir en hefur ekki skilað árangri, þannig að skrifað væri undir kjarasamning, enn sem komið er. Ljóst er að rekstur ISAL hefur gengið illa á undanförnum árum en sú staða er hins vegar ekki komin til vegna ákvarðana almenns starfsfólks sem nú virðist eiga að borga brúsann að minnsta kosti með samningsleysi og þar skortir fullkomlega vilja eigenda til að skrifa undir samningsdrög. 

Skrifað var undir kjarasamning við Elkem Ísland í vikunni, eins og fram hefur komið á síðunni. Samningurinn verður kynntur fyrir starfsfólki í vikunni. Fundað var með fulltrúum Norðuráls en málin þokast mjög hægt áfram í þeim viðræðum. Boðað hefur verið til næsta fundar í vikunni og afar mikilvægt er að það fari að sjá fyrir endann á þeim viðræðum. 

Á þriðjudag afhentum við spjaldtölvur í Fjölbrautarskólanum í Breiðholti til nýnema í rafiðngreinum. Um 40 nýnemar eru í FB og var afar vel tekið á móti okkur þar. Gríðarleg ánægja er á meðal nemenda með þann stuðning sem við veitum þeim með þessum hætti. Gjaldfrjálst rafrænt námsefni sem notað er við kennsluna og tölvubúnaður til að tryggja gott aðgengi að efninu.

Rétt er að vekja athygli á frétt á heimasíðu ASÍ þar sem fjallað er um það þegar veður hamlar vinnu. Hvetjum við félaga okkar til að skoða þetta. Smellið hér. Þar segir meðal annars: "Ítrekað vakna spurningar um réttindi launafólks þegar gefnar eru út veðurviðvaranir. Rétt er að vekja athygli á því að um það er fjallað á vinnuréttarvef ASÍ. Þar er niðurstaðan sú að launagreiðslur falla almennt ekki niður vega veðurs." Auk þess segir "... er það meginreglan þegar ekki er um force major atvik að ræða að laun skulu greidd."

Hvetjum félaga til að fara varlega þar sem veðurspá er verulega slæm og búið er að lýsa yfir óvissuástandi. Jafnframt er mikilvægt að fyrirtæki hugi að öryggi starfsmanna og geri skynsamlegar ráðstafanir til samræmis við veðurspár.

Í dag var kjarasamningur undirritaður á milli RSÍ, FIT, VR & VLFA við Elkem Ísland. Kjarasamningurinn verður kynntur fyrir starfsmönnum í næstu viku á kynningarfundi á Grundartanga. 

Hér eru upplýsingar hve marga punkta þurfti til að fá úthlutað um Páskana.

Menntamálin eru ofarlega í starfinu hjá RSÍ. Um mjög langt skeið höfum við ítrekað unnið að því að auka veg iðnmenntunar á Íslandi og nýtum við hvert tækifæri til þess að stuðla að aukinni aðsókn í greinarnar okkar. Síðustu tvö ár hefur aðsókn jafnt og þétt verið að aukast í rafiðngreinar í skólunum sem er gríðarlega mikilvægt enda er skortur á starfsfólki í þeim greinum. Við höfum kallað eftir því að gerð verði mannafla- og færnispá fyrir íslenskt samfélag með reglubundnum hætti. Þannig megi stýra betur framboði náms í menntakerfinu með þarfir samfélagsins að leiðarljósi. Þegar fjölga þarf nemendum í ákveðinni grein verði horft til þess að auka fjármagn samhliða. Það er kostnaðarsamt fyrir samfélagið að mennta fólk til starfa sem ekki eru til eða þörf fyrir.

Iðnaðarmannafélagið í Reykjavík hefur á undanförnum áratug lagt baráttunni lið með ýmsum hætti. Í gær var árleg nýsveinahátíð haldin í Ráðhúsi Reykjavíkur þar sem nýsveinum sem luku sveinsprófi með afburðaárangri veitt verðlaun. Ánægjulegt er að sjá nýsveina úr rafiðngreinum standa sig með jafngóðum árangri og raun ber vitni. 

Í líðandi viku voru haldnir fjölmargir fundir vegna kjarasamninga en hæst bar þó fundur með iðnaðarmönnum sem starfa hjá ISAL. Farið var yfir stöðu þeirra kjaraviðræðna sem standa yfir við fyrirtækið en samningurinn rann út í lok maí á síðasta ári og því augljóst að þolinmæði eftir endurnýjuðum kjarasamningi er löngu þrotin. Einhugur var í hópnum að staðan væri óásættanleg og að nauðsynlegt væri að ná fram kjarasamningi, með undirritun beggja samningsaðila, svo starfsmenn geti fengið sínar réttmætu launahækkanir sem byggja á þeim kjarasamningum sem gerðir hafa verið á undanförnu ári. Staða fyrirtækisins getur verið snúin en það getur ekki verið hlutverk starfsfólks að sætta sig við að bera ábyrgð á slökum rekstri eigenda sem hafa tekið mjög afdrifaríkar ákvarðanir um reksturinn sem veldur þeirri stöðu sem uppi er. Starfsfólk hefur ekki notið góðs þegar vel gengur og hví ætti svo að vera þegar verr árar. Það var gríðarlega gott að finna fyrir þeirri gríðarlegu samstöðu sem var í hópi iðnaðarmanna. 

Fundað var með fulltrúum Norðuráls í vikunni þar sem áfram var unnið með mögulegar breytingar á vaktakerfi fyrirtækisins með þeim hætti að falla frá 12 tíma vöktum og færa yfir á 8 tíma vaktir enda hafa verið miklar umræður um það á meðal starfsfólks um slíkt. Það er mikið álag á starfsfólk að standa langar vaktir við krefjandi aðstæður. Sérstakur fundur í minni hópi þar sem eingöngu voru rædd málefni iðnaðarmanna hjá Norðuráli. Meðal málefna voru framhaldsnám stóriðjuskóla og hvernig hann nýtist iðnaðarmönnum og mögulegar breytingar á samspili við eftirmenntunarstofnanir iðnaðarmanna, RAFMENNT og Iðuna. Fyrirkomulag útkalla, skipulag starfseminnar og umræður voru um faglega stjórnun á svæðinu. Allt eru þetta atriði sem starfsfólk telur bráðnauðsynlegt að ræða og gera bætur á.

Niðurstöður liggja fyrir úr atkvæðagreiðslum um kjarasamninga RSÍ við Ríkið og Reykjavíkurborg. Samningarnir voru samþykktir í atkvæðagreiðslunum. 

Í vikunni var fundað vegna stefnumótunar RSÍ en sú vinna hefur verið í gangi innan RSÍ frá því undir lok síðasta árs en sú vinna byrjaði með svokallaðir SVÓT greiningu á vinnufundi miðstjórnar RSÍ og haldið var áfram með fræðslu fyrir þá aðila sem vinna að þessu og endar á því að stefna RSÍ til næstu 5 ára mun liggja fyrir á sambandsstjórnarfundi RSÍ í byrjun maí. Einn mikilvægasti þáttur í þessari stefnumótunarvinnu verður að hitta félaga RSÍ víðsvegar um landið en boðað verður til opinna funda með hagaðilum undir lok febrúar. Fundartímar og staðsetningar verða vel auglýstar þegar þar að kemur.

Miðstjórn ASÍ fundaði í vikunni en þar var farið yfir stöðu mála hjá Bjargi íbúðafélagi. Bjarg hefur nú þegar afhent 194 íbúðir til leigjenda, 269 íbúðir eru í byggingu og alls eru 440 íbúðir í hönnunarferli. Þetta gerir alls 903 íbúðir. Bjarg hefur undirritað viljayfirlýsingar við sveitarfélög um stofnframlög vegna 1.300 íbúða. Það er augljóst að áhrif innkomu Bjargs inn á leigumarkaðinn er mikil. Leiguverð hefur lækkað, aðbúnaður leigutaka hefur oft á tíðum batnað til muna. Áframhaldandi uppbygging getur því skilað samfélaginu margfalt betri stöðu í fasteignamálum. Samhliða þessu er forysta ASÍ að vinna að endurbótum á fasteignamálum þeirra sem eru að koma inn á fasteignamarkaðinn, auðvelda fólki að kaupa fyrstu fasteign, auðvelda fólki að fjármagna fasteignakaup heilt yfir og draga úr vaxtakostnaði. 

Miðstjórn RSÍ fundaði undir lok vikunnar þar sem staða kjarasamninga var rædd, yfirlýsing stjórnvalda í tengslum við kjarasamninga og hvernig útlitið væri framundan. Miðstjórn sendi frá sér stuðningsyfirlýsingu vegna verkfalla félaga Eflingar stéttarfélags. Farið var yfir afmælisár RSÍ og þá viðburði sem framundan eru á árinu. 28. nóvember fagnar RSÍ 50 ára afmæli. Fjölskylduhátíð RSÍ verður að vanda haldin á Skógarnesi og ekki er ólíklegt annað en að hún verði jafnvel veglegri en oft áður. Hátíðin verður helgina 19. - 21. júní. Fjölmargt fleira var rætt og gert á fundinum.

Það var mjög ánægjulegt að fá fréttir frá Seðlabanka Íslands þar sem stýrivextir voru lækkaðir enn meira eða um 0,25 prósentustig. Stýrivextir SÍ eru því komnir undir 3% eða nánar tiltekið í 2,75% sem eru sögulega lágir stýrivextir! Stýrivextir hafa því lækkað um 1,75 prósentustig frá undirritun kjarasamninga í maí 2019. 

Hvaða áhrif hefur það ef vextir fasteignalána lækka um 1,75%? Jú ef heimili er með 20 milljónir króna í fasteignalán og vextir lækka um 1,75% þá getur það þýtt vaxtalækkun upp á tæplega 30.000 kr. á mánuði. Það getur þó verið misjafnt eftir því hvaða lánaform er samið um og hvernig afborganir eru. En það er augljóst að sóknarfæri fyrir skuldsett heimili að endurfjármagna á mikið betri vaxtakjörum og oft á tíðum náð fram verulegum sparnaði. Rétt er geta þess einnig að ársverðbólga mældist 1,7% í janúar. 

Kristján Þórður Snæbjarnarson

Formaður RSÍ