Fréttir eftir ári
Útgáfa
Fréttir frá 2014
10 17. 2014
Staða kjaraviðræðna
- Ítarupplýsingar
Staða kjaraviðræðna
Þegar þetta er skrifað þá hefur samninganefnd RSÍ átt tvo fundi með Samtökum atvinnulífsins og Samtökum rafverktaka vegna endurnýjunar kjarasamnings RSÍ-SA/SART auk þess að fundir hafa verið haldnir vegna sérkjarasamninga sem RSÍ gerir við ýmis fyrirtæki. Eins og fram kemur í kjarasamningum sem undirritaðir voru fyrr á árinu var það liður í því að stuðla að bættum vinnubrögðum og koma í veg fyrir að viðræður dragist úr hófi.
Það eru þó nokkur atriði sem valda því að ferlið fer hægt af stað en það er meðal annars að í dag er enn unnið að því að endurnýja kjarasamninga og jafnframt er beðið upplýsinga frá Hagstofu Íslands varðandi ávinning kjarasamninganna og greiningu á launaþróun undanfarinna ára. Það kemur þó ekki í veg fyrir að unnið verði að breytingu á ákvæðum kjarasamningsins sem nauðsynlegt er að leiðrétta.
Ávinningur síðustu kjarasamninga hefur verið töluverður ef við horfum til stöðu verðbólgu liðins árs en í dag er ársverðbólga 1,8%. Það sem styður við lága verðbólgu eru sumpart vegna aðgerða Seðlabanka Íslands en í peningastefnu bankans er í dag það svigrúm sem skapast vegna styrkingar á íslensku krónunni nýtt til þess að efla gjaldeyrisvaraforða bankans og á móti hefur bankinn stutt við gengi krónunnar þegar það hefði annars veikst. Þetta kemur fram í auknum stöðugleika að minnsta kosti til skamms tíma. Jafnframt má sjá ávinning af kjarasamningum sem gerðir voru í desember 2013 og febrúar á þessu ári. Ávinningurinn skiptir heimili landsins miklu máli þegar kemur að skuldahlið þeirra.
Það var mikilvægur þáttur sem nefndur var á öllum félagsfundum RSÍ fyrri hluta þessa árs að það myndu allir taka þátt í þessari vegferð og voru uppi miklar efasemdir um að gengi eftir. Svo fór að það tóku ekki allir þátt í vegferðinni og er það miður. Ekki það að við viljum ekki að laun hækki heldur er það sökum þess að við sjáum skýran ávinning af vegferðinni hvað varðar verðbólgu eins og áður sagði. Því verðum við að spyrja okkur hvaða áherslur við viljum leggja á í næstu vegferð. Á hvaða forsendum höldum við áfram í næstu vegferð?
Viðhorfskönnun vegna kjarasamninga
Á næstu vikum verður send út viðhorfskönnun vegna kjarasamninganna. Samninganefndir RSÍ hafa allar óskað eftir því að fá fram viðhorf okkar fólks líkt og við gerðum í aðdraganda síðustu kjarasamninga. Framkvæmdin verður með sambærilegum hætti þ.e.a.s að tölvupóstur verður sendur út á alla þá félagsmenn sem eru með tölvupóstföng á skrá hjá RSÍ. Við hvetjum ykkur til þess að miðla þessum upplýsingum áfram til ykkar vinnufélaga fái þeir ekki þennan póst. Til þess að skrá netfang þá er farið inn á orlofshúsavef RSÍ.
Við vekjum sérstaka athygli á því að nýverið var í gangi launakönnun RSÍ sem framkvæmd var af Capacent og eru þessar kannanir ótengdar og því gætu einhverjir þurft að taka þátt í tveimur könnunum sem eru okkur jafn mikilvægar. Í launakönnun er eingöngu afmarkað úrtak upp á 1.350 manns en viðhorfskönnun sem í bígerð er nær til allra félagsmanna.
Félagsfundir vegna kjarasamninga
Fyrirhugaðir eru félagsfundir vegna undirbúnings kjarasamninga seinni hluta nóvembermánaðar og farið verður eins víða um land og tími gefur möguleika á. Hádegisfundir hafa reynst best en mögulega verðum við að fjölga fundartímum til þess að komast víðar að. Fundartímar verða auglýstir sérstaklega síðar.
Hafi félagsmenn óskir um að fá fulltrúa frá RSÍ í heimsókn á vinnustað þá hvetjum við ykkur til þess að skrá óskir um slíkt á vefsíðu RSÍ, smelltu hér.