Kjarasamningar framlengdir með breytingum!

Ítarupplýsingar

Rétt í þessu voru undirrituð skjöl sem tryggja gildi kjarasamninganna, búið er að stytta gildistíma þeirra samninga sem giltu til 31. janúar 2014 til 30. nóvember á þessu ári (stytting um tvo mánuði). Laun munu því hækka um 3,25% um næstu mánaðarmót (til greiðslu mánaðarmótin febrúar/mars), en ákveðnir launataxtar hækka um 11.000 kr samkvæmt kjarasamningunum. Jafnframt er nú hafið átak í atvinnu- sem og verðlagsmálum. Stærsti óvinur íslensks launafólks er verðbólga en hún hefur verið allt of há á undanförnum árum og síðasta áratug. Því er það verkefni okkar á þessu ári að vinna markvisst gegn verðlagshækkunum á Íslandi með því að við neytendur, félagsmenn aðildarfélaga RSÍ, ASÍ sem og aðrir landsmenn taki höndum saman og verðum virkir neytendur. Fylgjumst með verðlagsbreytingum og látum í okkur heyra. Við skulum láta vita þegar verðlag verslana helst stöðugt eða lækkar. Við skulum láta heyra enn frekar í okkur ef verðlag hækkar!

Það er kominn tími til þess að láta á það reyna hvort við getum náð svipaðri stöðu og í Þjóðarsáttinni í kringum árið 1990, hvort mögulegt sé að ná verðbólgu niður hér á landi með samtakamætti Íslendinga. Það er allt að vinna í þessu, lægra verðlag, lægra vaxtastig, aukin velferð heimila landsins ásamt auknum ráðstöfunartekjum heimilanna.

Takist þetta ekki, fyrirtæki velti hækkunum út í verðlag, ríki og sveitarfélög hækki gjaldskrár á þjónustu þeirra og verðbólga aukist í framhaldinu þá getum við væntanlega gefið okkur það að sú leið hefur verið fullreynd og við þurfum að leita nýrra leiða. Sú leið getur vart verið án breytinga á peningastefnu okkar, staða gjaldmiðils verði styrkt með raunsæjum hætti, getur ekki verið án breyttra starfshátta á Alþingi Íslendinga sem og þjóðarbúsins í heild. Við verðum að horfa til lengri tíma til þess að auka lífsgæði íslensks launafólks, raunveruleg lífsgæði!

Strax á næstu dögum verður hafist handa við undirbúningsvinnu við gerð næstu kjarasamninga, RSÍ sem og aðildarfélög þess munu ekki láta sitt eftir liggja í þessum málum. Kröfur munu væntanlega taka mið af þróun þessa árs hvað varðar verðlag og því afar mikilvægt að allt gangi sem skyldi.

Unnið verður að atvinnustefnu á næstu vikum með það að markmiði að efla vinnumarkaðinn, fjölga góðum störfum til að bæta lífskjör á grunni stöðugleika. Jafnframt verður unnið að fleiri mikilvægum þáttum sem verða ekki tíundaðir að sinni. 

Skjöl sem undirrituð voru er að finna hér:

Skjal forsendunefndar ASÍ og SA

Samkomulag ASÍ og SA vegna endurskoðunar og framlengingar kjarasamninga

Kristján Þórður Snæbjarnarson

Formaður RSÍ