04 16. 2003
- Ítarupplýsingar
Að marggefnu tilefni er ástæða til þess að taka það fram að það er Eftirmenntunarnefnd rafeindavirkja sem hefur átt í málaferlum við fyrrv. starfsmann nefndarinnar, vegna meints fjárdráttar úr eftirmenntunarsjóði rafeindavirkja og misferlis í starfi við Rafiðnaðarskólann. En hann gegndi skólastjórastöðu við Rafiðnaðarskólann.
Eftirmenntunarnefndina skipa 2 fulltrúar tilnefndir af Félagi rafeindavirkja og 2 tilnefndir af Samtökum atvinnurekenda í raf- og tölvuiðnaði úr Félagi rafeindavirkjameistara.
Nú hefur fallið dómur fyrir Héraðsdómi Reykjavíkur þar sem fallist er á allar kröfur Eftirmenntunarnefndar rafeindavirkja og kyrrsetningaraðgerð staðfest.
Rafiðnaðarsamband Íslands er ekki aðili að þessum málaferlum og ekki formaður sambandsins. Hann er ekki í Eftirmenntunarnefndinni. Nafni hans hefur verið aftur á móti ítrekað blandað saman við þessi málaferli með ákaflega ósmekklegum og ósanngjörnum hætti.
Eins og margoft hefur komið fram þá hafa fulltrúar samtaka rafiðnaðarmanna ekki viljað taka þátt í opinberri umræðu um þessi mál á meðan málið hefur verið í rannsókn og fyrir dómstólum. Þetta hafa sumir nýtt sér til þess að koma af stað margskonar villandi upplýsingum, rangtúlkunum og ógeðfelldum ásökunum, sérstaklega í garð formanns RSÍ.
Formaður RSÍ hefur ásamt starfsmönnum sambandsins og Rafiðnaðarskólans undanfarið ár tekist á við gífurlegan rekstarvanda skólakerfisns og þá óreiða sem skólastjórinn fyrrverandi skyldi eftir sig. Tekið hefur verið mjög skynsamlega á þeim málum og er sú vinna að skila sér í því að tekist hefur að bjarga Rafiðnaðarskólanum.
Fh. Félags rafeindavirkja Einar Jón Ólafsson.
