„Þetta er tveggja ára nám hjá okkur. Fyrsta önnin hjá okkur er á þriðja hæfnisþrepi en hinar þrjár eru á fjórða hæfnisþrepi, fjórða hæfnisþrepi eru háskólaeiningar,“ segir Halldór Bragason, kennari í stafrænni hönnun í Tækniskólanum. Skrúfudagurinn var haldinn hátíðlegur 21. mars síðastliðinn. Á meðal þeirra sem þar kynntu starfsemi sína var deild stafrænnar hönnunar.

Nám í stafrænni hönnun samanstendur af þrívíddarhönnun, tölvuleikjagerð og kvikmyndabrellum. Á vef skólans segir að markmið námsins sé að nemendur fái sértæka þekkingu á öllum þáttum framleiðslunnar.

Halldór bendir á að útskrifaðir nemendur veljist í ýmis tæknistörf við kvikmynda- og tölvuleikjagerð og til framleiðslu á tölvuleikjum, teiknimyndum og tæknibrellum fyrir kvikmyndir. Einnig fái þeir störf sem tengjast upptökum á kvikmyndum og sjónvarpsefni og eftirvinnslu á því efni.

Nám í stafrænni hönnun er í senn skapandi og krefjandi að sögn Halldórs. Mikil áhersla er lögð á sjálfstæð vinnubrögð, hugmyndavinnu, skipulag og að nemendur tileinki sér nýjustu tækni hverju sinni. Auk sjálfstæðra vinnubragða er einnig áhersla á hópavinnu.

Framhaldsnám í Bretlandi

Nemendur við þessa braut eru að jafnaði um 40 talsins þótt útskriftarhópurinn hafi verið fámennari en oft áður þetta vorið. 10 nemendur útskrifast í vor. Halldór segir aðspurður að útskrifaðir nemendur úr stafrænni hönnun fari margir hverjir í frekara háskólanám út fyrir landsteinana. „Við eigum til dæmis í góðu sambandi við háskóla í Bretlandi, sem taka við nemendum frá okkur. Þar fara þeir stundum beint í mastersnám og hoppa þá jafnvel yfir eitt ár,“ segir hann.

Á fyrra ári námsins kynnast nemendur möguleikum stafrænnar hönnunar og læra á helstu forrit. Halldór bendir á að innan stafrænnar hönnunar séu mörg svið og undir hverju sviði séu margar greinar. Áhugi nemenda ræður því á seinna árinu hvaða leið þeir velja að sögn Halldórs. „Hópurinn sem er að útskrifast núna er mikið í eftirvinnslu kvikmynda en við höfum líka útskrifað hópa sem eru meira inn í tölvuleikjunum,“ segir hann.

Halldór bendir á að eins og í tilfelli fleiri skóla hafi námsgjöld verið lækkuð verulega. Önnin kostaði áður 300 þúsund en nemendur greiða nú ekki nema 30 þúsund. Námið ætti því að vera á allra færi.

Nemendur í hópi Emmy-verðlaunahafa

Á Skrúfudaginn voru verk nemenda til sýnis en þar héngu uppi ýmis veggspjöld þekktra kvikmynda og þáttaraða. Halldór bendir á að fyrrverandi nemendur við skólann hafi fengið Emmy-verðlaun 2024 fyrir tæknibrellur í þáttaröðinni Last of us, ásamt félögum sínum í Storm Studios í Noregi. „Sumir nemenda okkar sem hafa farið áfram í nám og svo fengið vinnu við iðnaðinn hafa komið heim og miðlað til okkar þekkingu sinni,“ segir Halldór stoltur.

Hann segir að eitt af uppleggjum deildarinnar sé að hafa gaman. Hann sýndi blaðamanni og ljósmyndara skemmtilegt og frumlegt vinnurými sem er hannað eins og kafbátur. „Við vildum búa hér til rými sem ýtir undir skapandi hugsun – og úr varð þessi kafbátur. Við leggjum mikið upp úr því að námið sé skemmtilegt og að fólki líði hér vel,“ segir hann að lokum.

— Viðtal við nemanda —

Allir vegir eru færir með rétta hugarfarinu

„Fyrra árið snýst mjög mikið um að opna huga manns. Þá fær maður að kynnast öllum sviðum stafrænnar hönnunar, svo sem tölvuleikjum, teiknimyndum og kvikmyndagerð,“ segir Andrés Blær Oddsson, útskrifarnemandi í stafrænni hönnun.

Andrés var þríútskrifaður úr Tækniskólanum áður en hann ákvað að bæta við sig stafrænni hönnun. „Ég kláraði fyrst ljósmyndun, tók svo stúdentinn og loks graffíska miðlun. Það var í graffísku miðluninni sem ég kynntist þessu námi. Þannig var að kennari kom yfir og vantaði hjálp við að prenta út bíómyndaveggspjald. Ég heimtaði þá að fá kynningu á því hvað væri eiginlega í gangi hér,“ segir hann og hlær. Hann bætir við að þessi bakgrunnur hans í ljósmyndum og graffískri miðlun hafi reynst honum vel í náminu.

Andrés segir að samvinna sé mikilvægur þáttur í náminu. Nemendur séu hvattir til að vinna saman og leysa verkefni sameiginlega. „Það sem gerist oftast er að hóparnir þéttast þegar fólk fer að vinna saman. Það er virkilega gaman og lykilatriði í þessum iðnaði,“ útskýrir Andrés. Oft þurfi að leita lausna langt út fyrir veggi skólans, til dæmis hvað varðar efnisöflun. „Hér eru nemendur með drifkraft og redda græjum, förðun, myndavélum eða hverju sem þarf að redda til að framleiða efni sem við svo vinnum með,“ segir hann og bætir við að kennararnir ýti undir þetta. „Með rétta hugarfarinu eru manni allir vegir færir í þessum iðnaði.“

Andrés hefur sérhæft sig í eftirvinnslu kvikmynda og segist, í lauslegri túlkun blaðamanns, setja saman tæknibrellur og verk sem aðrir tæknimenn hafa búið til. Það getur til dæmis verið bakgrunnur eða hreyfingar einhverra karaktera sem ekki eru persónur af holdi og blóði. Hann nefnir Hulk sem dæmi. Þar annist einhver útlit Hulks en annar lætur jörðina brotna þegar hann stígur niður. „Það sem ég geri til dæmis er að rekja myndavélar í þrívídd til að geta bætt myndefnið og sett það saman. Það kallast þrívíddarrakning. Þetta er djúp laug,“ viðurkennir hann.

Fjórir útskriftarnemendur vorið 2026 komust inn í framhaldsnám í Bournemouth University. Þangað fer Andrés í haust. „Ég stefni á að halda áfram að læra þetta þar og vonast svo til þess í framhaldi að fara beint inn í iðnaðinn.“

Hér fyrir neðan má sjá svipmyndir frá Skrúfudeginum