Fyrsta stjórnin.
Á framhaldsstofnfundinum kom að því að kjósa fyrstu stjórn hins nýstofnaða
félags. Kom fáum á óvart, að undirbúningsnefndin skyldi í heilu lagi vera kjörin
fyrsta stjórn félagsins. Var Ólafur L. Jónsson kjörinn formaður, en
meðstjórnendur þeir Karl Guðmundsson, sýningarstjóri í Tjarnarbíói, og Ólafur
Árnason, sýningarstjóri í Gamla Bíói. Ákvað stjórnin með sér þá verkaskiptingu,
að Karl yrði gjaldkeri en Ólafur ritari. Þá voru þeir Sigurður Gíslason og
Þorsteinn Dagbjartsson tilnefndir sem fyrstu endurskoðendur félagsins.
Á fundinum voru einnig samþykkt lög félagsins og ákveðið að hefjast þegar handa
við að skrifa öllum starfandi sýningarmönnum á landinu og skýra þeim frá stofnun
félagsins og gefa þeim kost á að gerast meðlimir þess.
Sömuleiðis var ákveðið að ganga þegar í að útskýra tilgang félagsins og fá
viðurkenningu frá hinu opinbera á starfsemi þess og nauðsyn þess, að fá setta
reglugerð um opinberar kvikmyndasýningar.
Óhætt er að fullyrða, að sýningarstjórarnir þrír, sem skipuðu fyrstu stjórn
F.S.K. og hvöttu fyrstir til stofnunar þess, hafi verið leiðtogar íslenskra
sýningarmanna á þessum árum. Enginn þó meiri en Ólafur L. Jónsson, eða í Óli í
Bíó, eins og hann var gjarnan nefndur. Ólafur var þekktur maður í bæjarlífinu,
hafði yfirburðaþekkingu á kvikmyndum og hafði meðal annars unnið við nokkrar af
fyrstu kvikmyndatökum, sem fram fóru hér á landi.
Þegar Ólafur átti 40 ára starfsafmæli sem sýningarmaður, árið 1959, ritaði
Ólafur vinur hans Árnason, grein í Sýningarmanninn honum til heiðurs. Þar er
stuttlega vikið að stofnun F.S.K. með þessum orðum:
Það er á engan hallað, þegar ég fullyrði, að það er fyrst og fremst áhuga Ólafs
að þakka, að sú tilraun tókst og að félagið komst klakklaust yfir
byrjunarörðugleikana, sem voru fleiri en flesta grunar. Ólafur var líka kjörinn
fyrsti formaður félagsins og gegndi því ábyrgðarstarfi samfleytt í sjö ár.
|